ಸಾಕ್ಷಿ

ನಿರರ್ಥಕದ ಸಾರ್ಥಕ ಬೋಧೆ ಹರಿಸುವ ಮಹಾ ಮೌನಿಯಂತೆ

ಹಾಗೆ ಹೀಗೆ ಹಾಯುವ ಚಂಚಲ ಆತ್ಮದ ಕತ್ತಲ ರೂಪವಾಗಿ

ಯಾಕೆನ್ನದ ಸಾಕೆನ್ನದ ಬದುಕಲ್ಲದ ಇರವು

ಇರವಲ್ಲ ಸರಿವು

ಅತ್ತ ಇತ್ತ ಅಡ್ಡ ಉದ್ದ ಸುತ್ತಿಕೊಂಡ ಸುಳುಹು

ಮೆತ್ತಿ ಕುರುಹು

ಅರ್ಥವಿರದ ಪದದಲ್ಲೂ ಪರಿಣಾಮದ ಸೊಲ್ಲು

ಬೇಕಲ್ಲದ ದಿನದಲ್ಲೂ ತಪ್ಪಿಲ್ಲದ ಗುರಿಯು

ನಿಂದಲ್ಲದ ನಿಲುವಿಲ್ಲದ ಕರುಳ ಹುರಿಯು

ಮಾತು ಕಾಯ

ಮೌನ ಪರಕಾಯ

ಪರಿವೆಯಿರದ ನಂಟಿನಲ್ಲಿ

ಅಣಕವಾಗುವ ಜೀವ

ಹೊತ್ತು ಸಾಗುವ ಹುಸಿ

ಸತ್ಯದ ಒಡಂಬಡಿಕೆಯಲ್ಲಿ

ಸದಾ ಹೊರಳು ಸಾಕ್ಷಿ

-ಜಿ.ಕೆ. ರವೀಂದ್ರಕುಮಾರ್