top of page
  • ಜಿ.ಕೆ.ರವೀಂದ್ರಕುಮಾರ್

ನೆರಳ ಚಿತ್ರಗಳು

ಕಥಾಸರಿತ್ಸಾಗರ


ಪ್ರತಿ ಅಕ್ಷರವೂ ಏನೋ ಹೇಳಬೇಕೆಂದು ಬರುವಲ್ಲಿ

ಏನೆಂದುಕೇಳದೆ

ನನ್ನ ಕಥೆ ಹೇಳಲು ಬಳಸಿಕೊಂಡ ನನಗೆ

ಎಂದಾದರೂ ಒಂದು ದಿನ ಅವುಗಳ ಕಥೆ ಕೇಳಬಹುದು ಎಂದು


ನನ್ನ ಹಸಿವ ಹಿಂಗಿಸುವ ಭರದಲ್ಲಿ

ಒಂದು ತುತ್ತಿನ ಕಥೆಯನ್ನೂ ಕೇಳಲಾಗಿಲ್ಲ ಇದುವರೆಗೂ

ನನಗಾಗಿ ತೇದ ಪೆನ್ನು ರಿಫಿಲ್ಲುಗಳಿಗೆ

ಧನ್ಯವಾದ ಅರ್ಪಿಸದೆ ಬಿಸಾಕಿದ ವಿಷಾದವೆ ತುಂಬಿಕೊಂಡು


ಅಕ್ಷರದ ಚಡಪಡಿಕೆಯಲ್ಲಿ ಪದಗಳು ಬಾಳಿ

ತೆತ್ತ ತುತ್ತುಗಳಲ್ಲಿ ಔತಣವು ಕೂಡಿ

ಯಾರೋ ಹೋಗಿ ಏನೋ ಬಾಳಿ


ಕಥೆಯೊಳಗೆ ವಾಕ್ಯದೊಳಗೆ ಪದ ಅಕ್ಷರದೊಳಗೆ

ಅನ್ನದೊಳಗೆ ಅಗುಳಿನೊಳಗೆ ತುತ್ತು ಹಸಿವಿನೊಳಗೆ

ಇಂಗಿ ಇರುಕಿ ಇಳಿದು ಇರುವಂಥ ಹೊತ್ತಿನಲ್ಲಿ

ಚರಿತೆಯನು ಕೆತ್ತಿ


ಕೆತ್ತಿಸಿಕೊಂಡ ಚರಿತೆಗಳಲ್ಲಿ ಇರುಕಿದ ಕಥೆಗಳ ಹುಡುಕಲು

ಹೊರಟ ಎಲ್ಲರೂ ಅವರ ಕಥೆಗಳ ಹೇಳುತ್ತ

ಕೈಯೊಳಗಿನ ಪರಿಕರಗಳು ತಮ್ಮ ಕಥೆ ಹೇಳುತ್ತ

ಇಟ್ಟ ಹೆಜ್ಜೆ ಊರಿದ ನೆರಳು ತುಳಿಸಿಕೊಂಡ ನೆಲ

ಎಲ್ಲವೂ ಕಥೆಗಳ ಪೇರಿಸುತ್ತ


ಕಥಾಸರಿತ್ಸಾಗರವ ದಾಟದೆ

ದಿನ ಮುಟ್ಟಿ ಕಾಲ ದಾಟುವುದು ಎಲ್ಲಿ?

ಮಣ್ಣಾಗುವ ಎಲ್ಲವೂ ಕಲ್ಲ ಕಥೆಯಾಗಿ ಬಾಳಲು

ನಿಂತ ಕಲ್ಲುಗಳು ಮಾತ್ರ ಒಂಟಿ ಒಂಟಿ ಮುಂದೆಯೂ


ಮುಗಿದ ಸಾಮ್ರಾಜ್ಯದ ಮೆಲುಕಲ್ಲಿ

ಅವೇ ಅಕ್ಷರಗಳು ಉರುಳಿ

ಅವೇ ಕಥೆಗಳು ಕರಗಿ

ಮತ್ತೆ ತಳೆದ

ನಾನು ಯಾವ ಕಥೆಯ ಪುರಾತನ ಸಾಕ್ಷಿಯೋ

ವರ್ತಮಾನದ ಭಿಕ್ಷೆಯೋ

ನಾಳಿನ ಹಸಿವೆಯೋ


ಕಥೆಯ ಜಂಗುಳಿಯಲ್ಲಿ ಒಂದನೊಂದ ದಾಟಿ ತಳ್ಳಿ

ಈ ಕಥೆಯ ಪಾತ್ರ ಅಲ್ಲಿ

ಆ ಕಥೆಯ ಪಾತ್ರ ಇಲ್ಲಿ

ಶುರುವಾದ ಕಥೆಯಲ್ಲಿ ಇದ್ದವರು ಈಗ ಎಲ್ಲಿ?


ಸಾಕು ಪ್ರಶ್ನೆಯ ಮಾಲೆ

ಲೈಟ್ಸ್ ಆನ್ ಆದವು ಸುಮ್ಮನಿರಿ|

ಈಗೇನಿದ್ದರೂ ಬರೀ ಚಿತ್ರಕಥೆ

ಅಂತೆ


-ಜಿ.ಕೆ. ರವೀಂದ್ರಕುಮಾರ್


0 views0 comments

Recent Posts

See All

ನೆರಳ ಚಿತ್ರಗಳು

ಸಾವಯವ ಸುಪಾರಿ ಕೊಲ್ಲಲು ದುಡ್ಡು ಕೊಟ್ಟರೆ ಸುಪಾರಿ ಕೊಲ್ಲುವ ಕಥೆಗೆ ದುಡ್ಡು ಕೊಟ್ಟರೆ ಪ್ರಾಯೋಜನೆ ಕಥೆ ನೋಡಿ ಸುಮ್ಮನಿದ್ದರೆ ಮನರಂಜನೆ ಕೊಲ್ಲಲು ತೀರ್ಮಾನಿಸಿದರೆ ಅಪರಾಧ ಇಂಥ ಕೆಲಸ ಮಾಡುವಾಗ ಮನಸ್ಸಿನೊಳಗೆ ಸುಪಾರಿಯೂ ಪ್ರಾಯೋಜನೆಯೂ ಒಂದರೊಳಗೊಂದ

ನೆರಳ ಚಿತ್ರಗಳು

ಒಂದು ಕವಿತೆಯ ಪ್ರೊಮೋ ಕಥೆ ಸಾಗಬೇಕಾದರೆ ಒಮ್ಮೆ ಸಾಬೂನು ತಿಕ್ಕಿ ಕೋಲಾ ಕುಡಿದು ಜಾಮೂನು ತಿಂದು ಜಿರಲೆ ಕೊಂದು ಟಾಯ್ ಲೆಟ್ ಉಜ್ಜಿ ಕಥೆಗೊಂದು ತಿರುವು ಬೇಕಾದರೆ ಉಂಗುರ ತೊಡಿಸಿ ನೀಲಿ ಹಾಕಿ ನೆಕ್ಲೆಸ್ ತೊಟ್ಟು ಶೇವ್ ಮಾಡಿ ಪೂರಿ ಕರಿದು ಕಾರು ಹತ

ನೆರಳ ಚಿತ್ರಗಳು

ತಾಗಿಕೊಂಡ ಮೇಲೆ ತಾಗಿಕೊಂಡ ನೆರಳನ್ನು ತಾಗದಂತೆ ಬೆರಳಾಡಿಸುವ ಪುಟ್ಟ ಆಟವೇ ನಿಲ್ಲದ ಉಮೇದಾಗಿ ತಡೆಯಲಾಗದ ತುರ್ತಾಗಿ ಪ್ರತಿ ಗಳಿಗೆಯ ಮಿಂಚಾಗಿ ಆಡಿಸುವ ನಾನೇ ಆಟದ ದಾಳವಾಗಿ ಸೋಲದ ಛಲಕ್ಕೆ ಗೆಲ್ಲದ ಭಯಕ್ಕೆ ಉತ್ತರವನ್ನು ಬೇಡುತ್ತೇನೆ ಆಗೀಗ ಇರವಿನರ

Comments


bottom of page