top of page
  • ಜಿ.ಕೆ.ರವೀಂದ್ರಕುಮಾರ್

ನೆರಳ ಚಿತ್ರಗಳು

ಸಾವಯವ ಸುಪಾರಿ


ಕೊಲ್ಲಲು ದುಡ್ಡು ಕೊಟ್ಟರೆ ಸುಪಾರಿ

ಕೊಲ್ಲುವ ಕಥೆಗೆ ದುಡ್ಡು ಕೊಟ್ಟರೆ ಪ್ರಾಯೋಜನೆ

ಕಥೆ ನೋಡಿ ಸುಮ್ಮನಿದ್ದರೆ ಮನರಂಜನೆ

ಕೊಲ್ಲಲು ತೀರ್ಮಾನಿಸಿದರೆ ಅಪರಾಧ


ಇಂಥ ಕೆಲಸ ಮಾಡುವಾಗ ಮನಸ್ಸಿನೊಳಗೆ

ಸುಪಾರಿಯೂ ಪ್ರಾಯೋಜನೆಯೂ ಒಂದರೊಳಗೊಂದು ಸೇರಿ

ನಾನು ಅದೇ ಆಗಿರಲಿಕ್ಕಿಲ್ಲ ಎಂದು ಸಮಾಧಾನ ಪಟ್ಟುಕೊಳ್ಳುವಲ್ಲಿ


ಒಳ್ಳೆಯವನಾಗಿದ್ದವನು ಒಳ್ಳೆಯವನಾಗೇ ಉಳಿಯುವ

ಅಚಲ ನಿಷ್ಠೆ ಕಠಿಣ ತಪಸ್ಸು ಕೆಡಿಸುವಂತೆ

ಸದಾ ನುಗ್ಗುವ ಬ್ರೇಕಿಂಗ್ ನ್ಯೂಸ್

ಹತ್ಯೆ ಹಾದರ ವಂಚನೆ ನೋಡುತ್ತ ಕೇಳುತ್ತಲೂ

ಒಳ್ಳೆಯವನಾಗಿರುವುದೆಂದರೆ ಸುಲಭದ ಮಾತಲ್ಲ


ಇತ್ತೀಚೆಗೆ ಅಹಿಂಸೆ ತಲೆಯೆತ್ತಿ ಮಾತನಾಡುತ್ತಿಲ್ಲ

ಸುಮ್ಮನಿದ್ದರೂ ಏನೊ ಬೇಗುದಿ ಯಾಕೋ

ಮಗ್ಗುಲು ಮುರಿಯುವ ಬಯಕೆ ಬೇಡವೆಂದರೂ

ಬಾಯಿ ಬಿಟ್ಟರೆ ಮಾನನಷ್ಟ ಬಿಡದಿದ್ದರೆ ಮಾನವಂತ

ಹೋಗಿ ಬೆನ್ನು ತಟ್ಟಿ ಬಂದರೆ ಹಾರ್ದಿಕತೆ

ಕೂತೇ ಲೈಕ್ ಮಾಡಿದರೆ ಯಾವುದೋ ಸೆಕ್ಷನ್ನು

ಯೋಗ್ಯರೋ ಅಯೋಗ್ಯರೋ

ಮುಖಕ್ಕೆ ಮಸಿ ಬೀಳುವವರೆಗೆ ಎಲ್ಲರೂ ತತ್ತ್ವಮಸಿಯೇ


ಸಂತೆಯಲ್ಲಿ ಜವಾರಿ ಕೊತ್ತುಂಬರಿ ಸಾವಯವ ತರಕಾರಿ

ಕೊಂಡು ಮನೆಗೆ ಹೋಗುವಾಗ

ಹೀಗೆ ಏನೇನೋ ಆಲೋಚನೆ

ಸಧ್ಯ ನಾನೂ ಜವಾರಿ ಸಾವಯವ

ಇಚ್ಚಿತ ಇಳುವರಿಯ ಕಳ್ಳು ಬಳ್ಳಿ

ಅಲ್ಲಿ ಇಲ್ಲಿ ದಾರಿಮಾಡಿಕೊಂಡು ಹಬ್ಬಿ

ಹೀಗೇ ತಿನ್ನುವ ಮೊದಲು ಸ್ವಲ್ಪ ಸಾಧಕ ಬಾಧಕ ಚಿಂತನೆ

ತುಪ್ಪ ತಟ್ಟೆಗೆ ಬೀಳುವುದೇ ತಡ..


ಇರಲಿ ಯಾಕೆ ಅದೂ ಇದೂ

ಊಟ ಆಯಿತಲ್ಲ ಬಿಡಿ

ಈಗೇನಿದ್ದರೂ ಪಾನು ಸುಪಾರಿ

ಇನ್ನು ನೀವು ಯಾರೋ ನಾವು ಯಾರೋ

ಮುಂದೆ ಅಗತ್ಯ ಬಿದ್ದರೆ ಹೇಗೂ

ನಿಮ್ಮ ಹೆಸರು ನಮ್ಮ ಮನದಲ್ಲಿದೆ

ನಮ್ಮ ಹೆಸರು ನಿಮ್ಮ ಮನದಲ್ಲಿದೆ

ಚಿಂತೆ ಯಾಕೆ ಎಲ್ಲವೂ ತೆರೆದ ಅಂಚೆ


-ಜಿ.ಕೆ. ರವೀಂದ್ರಕುಮಾರ್


1 view0 comments

Recent Posts

See All

ನೆರಳ ಚಿತ್ರಗಳು

ಕಥಾಸರಿತ್ಸಾಗರ ಪ್ರತಿ ಅಕ್ಷರವೂ ಏನೋ ಹೇಳಬೇಕೆಂದು ಬರುವಲ್ಲಿ ಏನೆಂದುಕೇಳದೆ ನನ್ನ ಕಥೆ ಹೇಳಲು ಬಳಸಿಕೊಂಡ ನನಗೆ ಎಂದಾದರೂ ಒಂದು ದಿನ ಅವುಗಳ ಕಥೆ ಕೇಳಬಹುದು ಎಂದು ನನ್ನ ಹಸಿವ ಹಿಂಗಿಸುವ ಭರದಲ್ಲಿ ಒಂದು ತುತ್ತಿನ ಕಥೆಯನ್ನೂ ಕೇಳಲಾಗಿಲ್ಲ ಇದುವರೆಗ

ನೆರಳ ಚಿತ್ರಗಳು

ಒಂದು ಕವಿತೆಯ ಪ್ರೊಮೋ ಕಥೆ ಸಾಗಬೇಕಾದರೆ ಒಮ್ಮೆ ಸಾಬೂನು ತಿಕ್ಕಿ ಕೋಲಾ ಕುಡಿದು ಜಾಮೂನು ತಿಂದು ಜಿರಲೆ ಕೊಂದು ಟಾಯ್ ಲೆಟ್ ಉಜ್ಜಿ ಕಥೆಗೊಂದು ತಿರುವು ಬೇಕಾದರೆ ಉಂಗುರ ತೊಡಿಸಿ ನೀಲಿ ಹಾಕಿ ನೆಕ್ಲೆಸ್ ತೊಟ್ಟು ಶೇವ್ ಮಾಡಿ ಪೂರಿ ಕರಿದು ಕಾರು ಹತ

ನೆರಳ ಚಿತ್ರಗಳು

ತಾಗಿಕೊಂಡ ಮೇಲೆ ತಾಗಿಕೊಂಡ ನೆರಳನ್ನು ತಾಗದಂತೆ ಬೆರಳಾಡಿಸುವ ಪುಟ್ಟ ಆಟವೇ ನಿಲ್ಲದ ಉಮೇದಾಗಿ ತಡೆಯಲಾಗದ ತುರ್ತಾಗಿ ಪ್ರತಿ ಗಳಿಗೆಯ ಮಿಂಚಾಗಿ ಆಡಿಸುವ ನಾನೇ ಆಟದ ದಾಳವಾಗಿ ಸೋಲದ ಛಲಕ್ಕೆ ಗೆಲ್ಲದ ಭಯಕ್ಕೆ ಉತ್ತರವನ್ನು ಬೇಡುತ್ತೇನೆ ಆಗೀಗ ಇರವಿನರ

Comments


bottom of page