ಒಬ್ಬರ ಬಟ್ಟೆ ಬಿಚ್ಚುವುದು

ಒಬ್ಬರ ಬಟ್ಟೆ ಬಿಚ್ಚುವುದು

ಒಬ್ಬರ ಬಟ್ಟೆ ಬಿಚ್ಚುವುದು ಅವಮಾನ ಎಂದು ಮಾತ್ರ ತಿಳಿದವರು

ಸದಾ ಅದೇ ಕೆಲಸ ಮಾಡುತ್ತಾರೆ

ತಾವೂ ಬೆತ್ತಲಾದಂತೆ ಎಂದು ತಿಳಿಯುವರೆಗೆ

ಬೆತ್ತಲೆ ನಿಂತ ಮನುಷ್ಯನಿಗೆ ಬಟ್ಟೆ ತೊಡಿಸಲೂ ತಿಳಿಯದು

ಎಂದು ಮಾತ್ರ ತಿಳಿದವರು ಅದನ್ನು ಎಲ್ಲೆಡೆ ಹಂಚುತ್ತಾರೆ

ತಮ್ಮ ಮಾತೂ ಬೆತ್ತಲಾಗಿದೆ ಎಂದು ತಿಳಿಯುವರೆಗೆ

ಬೆತ್ತಲಾಗುವುದು ತಲೆಮಾರಿನ ಬಾಧೆ

ಬೆತ್ತಲು ಮಾಡುವುದು ತಲೆಮಾರಿನ ತೀಟೆ

ಅಲ್ಲೊಂದು ದೂರು ಪುಸ್ತಕ

ಅಲ್ಲಿ ಇನ್ನೊಮ್ಮೆ ಎಲ್ಲ ಸಂಭವಿಸಬೇಕು

ಕೇಳಿದ ಕರುಣೆಯಲಿ ತೇಲುತ್ತ

ನೋಡದ ಚಿತ್ರಗಳಲಿ ಮೀಯುತ್ತ

ಆಡಿದ ಮಾತುಗಳಲಿ ಈಸುತ್ತ

ದಾಟಿ ಪಶ್ಚಿಮವಾಹಿನಿ ಪೂರ್ವವಾಹಿನಿ

ನೂರುವಾಹಿನಿ

ಮರೆತುಬಿಟ್ಟಲ್ಲಿ ಜೀವನ ಉಳಿಸಿಕೊಳ್ಳಬಹುದು

ಇಲ್ಲವೇ ಚರ್ಮವನ್ನೂ ಬಿಚ್ಚಬೇಕಾದೀತು

ಸರಿ ಎಂದರೆ ನದಿಮೂಲ ಮುಚ್ಚಿ

ನದಿಯನ್ನು ಹರಿಯಬಿಟ್ಟಂತೆ

ಇಲ್ಲವೆಂದರೆ ನದಿಮೂಲ ತೆಗೆದು

ನದಿಯನ್ನು ಹರಿಯಗೊಡದಂತೆ

ನಾಗರಿಕತೆಗಳೆಲ್ಲ ನದಿ ತೀರದಲ್ಲಿ ಹುಟ್ಟಿವೆ

ಎಂದು ತಿಳಿದವರು

ನದಿಯು ಕಂಡಾಗಲೆಲ್ಲ ಮೀಯುತ್ತಿದ್ದಾರೆ

ದಡದಲ್ಲಿ ಕೂತ ಒಣ ಬಟ್ಟೆ ನೋಡಿಕೊಂಡು

ನಾಗರಿಕತೆಗಳು ಕಣ್ಮರೆಯಾದುದೂ ನದಿ ತೀರದಲ್ಲೇ

ಎಂದು ತಿಳಿದವರು

ಅಲ್ಲಿ ಇಲ್ಲಿ ಓಡಾಡಿಕೊಂಡಿದ್ದಾರೆ