ಕದವಿಲ್ಲದ ಊರಲ್ಲಿ

         ಒಂದು

ಬೆಳಗೆಂಬುದು ಒಂದು ಬೆರಗು

ಇರುಳೆಂಬುದು ನಿನ್ನೆಯ ಬೆರಗು

ಕರೆದರೂ ಸರಿವ

ಕರೆಯದಿದ್ದರೂ ಬರುವ

ಹೊತ್ತುಗಳ ಹರಿದಾಟದಲಿ

ಬೆಳಗೆಂದರೆ ಕಣ್ಣು

ತೊಳೆಸುವ ಅಮ್ಮ

ಇರುಳೆಂದರೆ ಲಾಲಿ

ತೂಗುವ ಅಮ್ಮ

ತೊಳೆಸುತ್ತ ತೂಗುತ್ತ ಕಾಪಿಡುವ ತಾಯಿಗೆ

ಕೂಸು ಮಲಗಿದರೆ ಇರುಳು

ಕೂಸು ಎದ್ದರೆ ಬೆಳಗು

ಹರಿವ ಹೊತ್ತಿಗೆ ತಾಯಿಯೆ ಒಂದು ಬೆರಗು

               ಎರಡು

ಬೆಳಗಿನ ಮೌನಗಳು ಒಂದು ಬೆರಗು

ಇರುಳಿನ ಸದ್ದುಗಳು ಒಂದು ಬೆರಗು

ಕರೆದರು ಸರಿವ

ಕರೆಯದಿದ್ದರೂ ಬರುವ

ದಿನಮಾನದ ವಹಿವಾಟಿನಲಿ

ಬೆಳಗೆಂದರೆ ಕಣ್ಣೀರು

ನೇವರಿಸುವ ಅಪ್ಪ

ಇರುಳೆಂದರೂ ಕಣ್ಣೀರು

ಬೆನ್ನಿಡುವ ಅಪ್ಪ

ನೇವರಿಸಿ ಬೆನ್ನಿಟ್ಟು ಕಾಪಿಡುವ ತಂದೆಗೆ

ಯಾಕೆನ್ನುವ ಹೆಂಡತಿಯೇ ಇರುಳು

ಯಾಕೆನ್ನದ ಹೆಂಡತಿಯೇ ಬೆಳಗು

ಹರಿವ ಹೊತ್ತಿಗೆ ತಂದೆಯೇ ಒಂದು ಬೆರಗು

              ಮೂರು

ಬೆಳಗಿನ ಅನುಮಾನ ಒಂದು ಬೆರಗು

ಇರುಳ ಅವಮಾನ ಒಂದು ಬೆರಗು

ಕರೆದರೂ ಬರುವ

ಕರೆಯದಿದ್ದರೂ ಬರುವ

ತಲ್ಲಣಗಳ ಸಂತೆಯಲಿ

ಬೆಳಗೆಂದರೆ ಉಪವಾಸ

ಎಡತಾಕುವ ಮಕ್ಕಳು

ಇರುಳೆಂದರೆ ಸಂಕಟ

ಹೊರಳಾಡುವ ಮಕ್ಕಳು

ಎಡತಾಕಿ ಹೊರಳಾಡಿ ದಿನದೂಡುವ ಮಕ್ಕಳಿಗೆ

ಒಲೆಯುರಿದರೆ ಬೆಳಗು

ಒಲೆಯಾರಿದರೆ ಇರುಳು

ಹರಿವ ಹೊತ್ತಿಗೆ ಹಸಿವೆಯೇ ಒಂದು ಬೆರಗು

           ನಾಲ್ಕು

ಬೆಳಗು ಬಂದುದೇ ಒಂದು ಬೆರಗು

ಇರುಳು ಹೋದುದೇ ಒಂದು ಬೆರಗು

ಕರೆದರೂ ಸರಿವ

ಕರೆಯದಿದ್ದರೂ ಬರುವ

ನಿಂತವರ ಮುಂದಿನ ಯಾನದಲಿ

ಬೆಳಗೆಂದರೆ ಬೇಡಿಕೊಳ್ಳುವ ಸೆರಗು

ಇರುಳೆಂದರೆ ನುಂಗಿಕೊಳ್ಳುವ ಕರುಳು

ನುಂಗುತ್ತ ಬೇಡುತ್ತ ತಳ್ಳಿಕೊಳ್ಳುವ ಜೀವಕ್ಕೆ

ಹರಿದುಕೊಂಡರೆ ಇರುಳು

ಹೊಲೆದುಕೊಂಡರೆ ಬೆಳಗು

ಕದವಿಲ್ಲದ ಊರಲ್ಲಿ ಬದುಕ ಹಿಡಿವುದೇ ಒಂದು ಬೆರಗು

-ಜಿ.ಕೆ. ರವೀಂದ್ರಕುಮಾರ್